Tsohon Sanatan Kaduna ta Tsakiya, Shehu Sani, ya soki shugabannin Arewa bisa gazawar da suka yi wajen bunƙasa yankin, inda ya ce lokaci ya yi da za su nemi gafara kuma su mara wa Shugaba Bola Ahmed Tinubu baya domin ya kammala shekaru takwas a mulki.
Yayin da yake magana da manema labarai a gidansa a ranar Litinin, Sani ya ce Arewa ta samu ci gaba a zahiri cikin shekaru biyu kacal na mulkin Tinubu.
- Jiragen Yakin NAF Sun Kashe ‘Yan Ta’adda 20, ‘Yan Banga 2 A Zamfara
- Shettima: Shekaru Biyu Na Mataimaki, Jagora Mai Hangen Nesa Da Kawo Sauyi Nagari
Ya ce, “Wasu daga cikin shugabanninmu sun samu dama su inganta rayuwar al’ummar Arewa amma sun kasa. Ya kamata su nemi afuwa. Yanzu da muna da gwamnati da ke aiki yadda ya kamata, wajibi ne mu ba ta goyon baya.”
Sanata Sani ya kuma gargaɗi mutanen Arewa da ka da su bari siyasar ƙabilanci ta raba su da gwamnatin da ke aiki fiye da na baya, yana mai tuna musu cewa Tinubu ya mara wa shugabannin Arewa baya lokacin da suke mulki.
Ya jaddada cewa yankin Arewa maso Yamma ya fitar da shugabanni biyu tun daga 1999, Umaru Musa Yar’Adua da Muhammadu Buhari kuma yankin Kudu maso Yamma ya mara musu baya ba tare da wata matsala ba.
Ya ce yanzu lokaci ne da Arewa za ta nuna adalci ta hanyar barin shugaba daga Kudu ya kammala wa’adin mulkinsa.
Ya ƙara da cewa, “Idan za a fitar da wani ɗan takarar shugaban ƙasa daga ‘yan adawa a nan gaba, to ya dace ya fito daga Kudu maso Yamma. Wannan ne dai-daito da adalci.”
Sanatan ya kuma soki gwamnatin baya da cewa ko da yake kusan dukkan shugabannin tsaro sun fito ne daga Arewa, amma hakan bai dakatar da ta’addanci a yankin ba, kuma bai hana hare-hare da kashe-kashe a jihohin Filato, Binuwai da sauran jihohin Arewa ta Tsakiya ba.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
