Shugaban Kasa: ACF Za Ta Goyi Bayan Ɗan Takarar Arewa A Zaɓen 2027

Kungiyar Arewa Consultative Forum (ACF), ta ce za ta mara wa dan takarar shugaban kasa daga Arewa a zaɓen 2027.

Kungiyar ta ce wannan mataki na da nufin ceto yankin Arewa daga gazawar shugabanci da matsalolin da ake fuskanta.

• Pep Guardiola Ya Tsawaita Kwantiragi A Manchester City Har Zuwa Shekarar 2027
• Matatar Dangote Ta Fara Fitar Man Fetur Dinta Zuwa Kasashen Afrika

Da yake jawabi a taron Majalisar Zartarwa na Ƙasa (NEC) na ACF da aka gudanar a Kaduna, Shugaban Ƙungiyar na Ƙasa, Mamman Mike Osuman, ya bayyana kalubalen da ke fuskantar yankin.

Ya ce akwai rashin tsaro, talauci, da rashin adalci.

Ya yi kira ga ‘yan Arewa su haɗa kai don inganta yankin tare da duba ayyukan shugabanni.

Osuman ya yi tambaya ko shugabannin Arewa suna ɗaukar matakan da suka dace don magance matsalolin cikin gida, kamar hakar ma’adanai ba bisa ka’ida ba, rashin tsaro, da ƙarancin wayar da kai.

Ya kuma yi kira ga haɗin gwiwa tsakanin shugabanni, sarakunan gargajiya, da masu ruwa da tsaki don shawo kan waɗannan matsalolin.

Kungiyar ACF ta nuna goyon bayanta ga ƙungiyar League of Northern Democrats (LND), wata sabuwar ƙungiya da ta dukufa wajen magance matsalolin yankin Arewa, ciki har da rashin aikin yi, ilimi, da tasirin siyasa.

Osuman ya jaddada buƙatar haɗin kai da shirye-shiryen da za su taimaka wajen kyautata makomar Arewa.