Kakakin ma’aikatar cinikayya ta kasar Sin, ya ce kasarsa na adawa da duk wata yarjejeniyar yafe haraji da Amurka za ta kulla da wata kasa, wadda ka iya illata moriyar Sin, tare da baiwa kasar da aka kulla yarjejeniyar damar samun yafiyar haraji daga Amurka.
Kakakin wanda ya bayyana hakan a jiya Asabar, lokacin da yake amsa tambayar da manema labarai suka yi masa, dangane da tattaunawar cinikayya da Amurka ta yi tare da wasu kasashe, ya ce, idan an samu aukuwar irin wannan yanayi, kasar Sin ba za nade hannu ba, za ta dauki matakai na martani domin kare halastattun hakkoki da moriyarta.
Jami’in ya kara da cewa, tun watan Afrilun da ya gabata, Amurka ke ta ingiza matakan kakaba harajin ramuwar gayya kan abokan cinikayyarta. wanda hakan mataki ne na nuna fin karfi da ya yi matukar keta tsarin gudanar da hada-hadar cinikayya na duniya, ya kuma haifar da cikas ga tsarin gudanar hada-hadar cinikayya tsakanin sassan kasa da kasa, kuma Sin ta sha nanata rashin amincewarta da hakan.
Daga nan sai jami’in ya ce, ta hanyar kare manufofinta, da matsayarta ne kadai kasa za ta cimma nasarar kare hakkokinta na halas. (Saminu Alhassan)
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
