Da misalin karfe 1 da mintoci 31 na asubar yau Ahamis, kasar Sin ta cimma nasarar harbar na’urar nazarin taurari a sararin samaniya mai lakabin “Tianwen-2,” inda aka yi amfani da roka daukar kayayyaki samfurin “Long March 3B Y110” daga cibiyar harbar tauraron dan Adam ta Xichang. Mintoci 18 bayan harbawa, rokar ta harba na’urar “Tianwen-2” don ta shiga da’irar kewayen tauraro mai lamba “2016HO3”. Daga baya, fikafikan tattara karfin hasken rana na na’urar suka fara aiki yadda ya kamata.
Sin ta kwashe shekaru 10 tana nazari da kirkiro na’urar “Tianwen-2”, kuma aikinta shi ne binciken tauraro mai lamba “2016HO3” tare da debo samfura daga doron kasan tauraron zuwa doron duniyarmu ta dan adam, daga baya za ta binciki tauraro mai wutsiya na 311P dake tsakanin da’irar duniyar Mars da duniyar Jupiter.
Shugaban hukumar kula da harkokin zirga-zirgar samaniya da hadin gwiwar kasa da kasa a wannan bangare wato CNSA Shan Zhongde ya ce, wannan muhimmin aiki shi ne ya kwashe lokaci mafi yawa tare da fuskantar kalubaloli da matsaloli da dama. Ya ce na’urar za ta yi tafiye-tafiye har matakai 10 nan gaba don tattara samfuran kasan tauraron, daga baya sashen “Tianwen-2” mai dawowa zai dawo doron duniyarmu a karshen shekarar 2027, kuma babban bangaren na’urar zai ci gaba da aiki da aka tanada don ziyartar tauraro mai wutsiya na 311P tare da gudanar da bincike. (Amina Xu)
