Sojoji Sun Hallaka ‘Yan Bindiga 4, Sun Kwato Makamai A Jihar Zamfara

Biyo bayan wani samame da jami’an soji na rundunar Operation Hadarin Daji, suka kai a wani sansanin ‘yan bindiga da ke kauyen Kumbo a cikin karamar hukumar Bukkuyum a jihar Zamfara, sun samu nasarar kashe ‘yan bindiga hudu tare da kwato makamai. 

Sojojin sun kai wannan samamen ne a jiya Talata, inda suka kwato bindigu kirar AK47 guda hudu da kwabsar albarusai biyu na bindiga kirar AK47 da kwabsar albarusai 26 masu nauyin 7.62 da Babura hudu da sauran wasu kaya.

• Sojoji Sun Kashe ‘Yan Ta’addar ISWAP 11, Sun Rusa Sansanoni A Dajin Sambisa

A cikin sanarwar da daraktan sashen yada labarai na rundunar Majo Janar Musa Danmadami ya fitar, ya bayyana cewa, sojojin sun samu nasarar ce, bayan musayar wuta da ‘yan bindigar.

Manyan mahukunta sojin, sun jinjinawa jami’an sojojin na rundunar Operation Hadarin Daji kan samun nasarar, sun kuma bukaci jama’a da su cigaba da baiwa jami’an rahoto kan duk wata maboyar ‘yan bindigar.