Sojoji Sun Kashe Ƴan Ta’adda 60 A Borno

Sojojin Rundunar Haɗin Gwuiwa ta Operation Hadin Kai sun kashe akalla ‘yan ta’adda 60 a wani artabu mai tsanani da ya afku a kauyen Bita, karamar hukumar Gwoza, jihar Borno.

Jami’an tsaro sun tabbatar da wannan nasara a safiyar Juma’a, inda suka bayyana cewa artabun ya yi sanadiyyar mutuwar daruruwan ‘yan Boko Haram, yayin da wasu suka tsere da raunukan harbin bindiga.

• Sojoji Sun Koka Bisa Jinkirin Yanke wa Ƴan Ta’adda 1,450 Hukunci
• Sojoji Sun Kashe ‘Yan Ta’adda Da Dama A Wani Sabon Hari Da Suka Kai Sansanin Sojoji A Borno

A cewar Mukaddashin Daraktan Hulɗa da Jama’a na Operation Hadin Kai, Kyaftin Reuben Kovangiya, ‘yan ta’addan sun kai hari cikin dare amma suka gamu da karfi daga dakarun soji, wanda hakan ya janyo musu mummunar asara.

Har ila yau, sojojin sun fatattaki wasu ‘yan ta’adda a garin Damasak da ke karamar hukumar Mobbar a wannan jihar, inda aka kuma kashe wasu daga cikin su, duk da ba a bayyana adadin ba.

Da yake tabbatar da nasarar da aka samu a Bita ga wakilinmu, Kyaftin Kovangiya ya bayyana cewa har zuwa lokacin da ake hada wannan rahoto, sashen sojin sama na ci gaba da luguden wuta a maboyar ‘yan ta’addan, kuma ana sa ran karin asara garesu.

Sojojin Najeriya sun ci gaba da nuna azama da jajircewa wajen murkushe kalubalen tsaro a yankin Arewa maso Gabas, tare da tabbatar da cewa ba za su yi kasa a gwiwa ba har sai an tabbatar da zaman lafiya mai ɗorewa.