Sulhu da ‘Yan Bindiga Ya Fi Zubar Da Jinin Ɗan Adam A Kaduna – Uba Sani

Gwamnan Jihar Kaduna, Uba Sani, ya ce gwamnatinsa ta zaɓi sulhu da ƴan bindiga domin kawo zaman lafiya maimakon ci gaba da rikici da zubar da jini.

A cewarsa, al’ummar yankunan Birnin Gwari da Giwa da sauran wurare sun nemi sulhu, ganin cewa shekaru sama da goma na tashin hankali ba su kawo ƙarshen matsalar ba.

• A Banza Man Kare: Barazana Da Takunkumi Sun Daina Tasiri
• An Watsa Bidiyon Dandanon Shagalin Murnar Bikin Bazara Na CMG A Karon Farko A Najeriya

“Da a kashe mutum ɗaya a Kaduna, gara na yi sulhu domin ranar ƙiyama zan amsa wa Allah,” in ji Uba Sani.

Gwamnan ya ce kafin amincewa da tattaunawar, an tattauna da shugabannin tsaro da malaman addini, kuma ƴan fashin su sako mutum 200 da suka yi garkuwa da su a jihar.

Ya jaddada cewa babu kuɗin fansa da aka biya, kuma sulhun ya taimaka wajen dawo da noma da kasuwanci a yankunan da matsalar tsaro ta addaba.