Kashi na 34 na tawagar likitocin kasar Sin da ke birnin Zanzibar na kasar Tanzaniya, sun gudanar da ayyukan kiwon lafiya kyauta ga marayu da ma’aikatan gidan marayun fiye da 200 a ranar Asabar da ta gabata a karkashin wani shirin ba da kulawa da aka yi wa lakabin “Angle’s Care Initiative” a Turance.
Likitocin kasar Sin daga sassa daban-daban da suka hada da kwararru a kan likitancin cikin jikin manya, da tiyata, da likitancin mata, da na ido, da na kunne da makogoro, da na hakora, sun gudanar da gwaje-gwaje na zahiri ga yara da ma’aikatan gidan na marayu.
- Ƴansanda Sun Gano Ƙarin Bama-Bamai 9 Da Basu Fashe Ba A Kano
- Binciken CGTN: Masu Bayyana Ra’ayoyi Na Kasa Da Kasa Sun Yi Allah Wadai Da Harin Amurka Kan Iran
Tawagar likitocin kasar Sin ta yi cikakken bayani game da gwaje-gwajen da ta gudanar tare da bai wa ma’aikatan gidan marayun umarni kan yadda ya kamata a rika bibiyar hanyoyin kulawa, da kuma ka’idojin magani ga wadanda ke fama da rashin lafiya. Har ila yau, bayan kammala binciken kiwon lafiyar, ‘yan tawagar sun raba kyaututtuka da suka hada da kayan makaranta, da kwallayen kafa, da kayan ciye-ciye ga yara.
Jami’ar tuntuba ta ma’aikatar kiwon lafiya ta Zanzibar, Mariam Khalfan ta nuna matukar godiyarta ga tawagar likitocin ta kasar Sin bisa taimakon da take bai wa Zanzibar.
Mariam ta kara da cewa, likitocin kasar Sin sun dadada ran marayun Zanzibar tare da kara musu kwarin gwiwa, inda suka kulla sada zumunci da ke ci gaba da karfafa dangantaka a tsakanin bangarorin biyu. (Abdulrazaq Yahuza Jere)
