Tinubu Ya Dawo Nijeriya Daga Landan Domin Bikin Babbar Sallah

A yammacin ranar Talata ne shugaba Bola Tinubu ya sauka a Legas daga birnin Landan, don gudanar da bukukuwan Babbar Sallah (Eid-el-Kabir) a gobe Laraba.

Jirgin shugaban kasa Tinubu ya isa filin jirgin sama na Murtala Muhammed da ke Ikeja, inda ya samu tarba daga dimbin magoya bayansa da ke jimirin isowarsa.

• Bikin Sallah: Kungiyar CAN Ta Yi Kira Kan Hadin Kai, Zaman Lafiya, Soyayya  Domin Ci Gaban Nijeriya

Tinubu ya shafe tsawon mako guda da barin Nijeriya inda ya halarci wani taro kan harkokin tattalin arziki a birnin Paris wanda shugaban Faransa Emmanuel Macron ya karbi bakunci.

Jim kadan bayan kammala taron a birnin Paris, Tinubu ya yi dan takaitaccen zango a birnin Landan na kasar Birtaniya don wata ziyara ta musamman.