Tinubu Ya Yi Ta’aziyyar Rasuwar Hajiya Dada Yar’adua

Shugaban ƙasa Bola Ahmed Tinubu, ya jajanta wa iyalan ‘Yar’adua bisa rasuwar Hajiya Dada, mahaifiyar marigayi tsohon shugaban ƙasa Umaru Musa ‘Yar’aduwa da marigayi Janar Shehu Musa ‘Yar’aduwa, wadda Allah Ya yi mata rasuwa a jiya Litinin tana da shekaru 102.

Cikin wata sanarwa da mai magana da yawun shugaban ƙasa, Ajuri Ngelale, ya fitar ya ce Shugaba Tinubu yana mika ta’aziyyarsa ga Sanata Abdulaziz Musa Yar’Adua, al’ummar Jihar Katsina, da sauran jama’ar da rasuwar marigayiyar ta shafa.

• Matatar Man Dangote Ta Fara Sarrafa Man Fetur
• Ƴan Bindiga Sun Kashe Ɗansanda Da Wani A Sakkwato

Shugaban da yake sake jajanta rasuwar Hajiya Dada, ya yaba halayenta na gari da suka haɗa da tausayi da imani da gaskiya da zumunci.

Ya yi addu’ar Allah Ya jikan marigayiyar tare da tabbatar da cewa za a ci gaba da tunawa da ita bisa goyon baya da zaman lafiya da gudunmawarta ga ƙasa.