Sakataren Kwamitin Rikon Kwarya (CECPC) na uwar jam’iyyar APC, Sanata James Akpanudoedehe, ya fice daga jam’iyyar APC kasa da ‘yan awanni a fara gudanar da zaben fitar da gwani na dan takarar shugaban kasa a ranar Talata.
Akpanudoedehe ya shaida hakan ne ta cikin sanarwar da ya fitar mai dauke da kwanan wata ta ranar 4 ga watan Yuni, 2022 kana ya kuma aike da ita ga Shugaban jam’iyyar APC a gundumar Offot 6, Uyo da ke jihar Akwa Ibom.
Takardar na cewa: “Na rubuta don na sanar da kai cewa na ajiye shaidar kasancewata mambar jam’iyyar APC. Don haka na fita daga jam’iyyar APC, ni yanzu ba mambar APC ba ne, kuma ba mambar Majalisar Ba da shawarwari ga APC, da mambar jiga-jigai na APC ta kas aba ne, dukka yanzu ni ba mambarsu ba ne daga yanzu.”
Ya ce duk da hakan, zai ci gaba da kokarinsa wajen ba da gagarumar gudunmawa domin cigaban yankin sa da jiharsa tare da kasa baki daya.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
