Wani Dan China Ya Kashe Masoyiyarsa Da Wuka A Kano

Wani dan Kasar China ya daba wa masoyiyarsa mai shekaru 23 wuka har lahira a unguwar Janbulo da ke karamar hukumar Kumbotso a Kano.

Rahotanni sun bayyana cewa lamarin ya faru ne da misalin karfe 10 na daren ranar Juma’a bayan wanda ake zargin ya zo ya ziyarci budurwar tasa mai suna Ummakulsum Sani Buhari a gidansu.

• FBI Na Neman Wani Dan Nijeriya Da Ya Damfari Amurka Dala Miliyan 30
• CAN Ta Yi Allah Wadai Da Harin Da Aka Kai Wa Hadimin Gwamnan Bauchi

Sai dai ya zuwa yanzu ba a tabbatar da abin da ya shiga tsakaninsu har ya kashe masoyiyar tasa ba.

Bayan faruwar lamarin an yi gaggawar garzayawa da ita asibiti, wanda a can ne rai ya yi halinsa.

Wani mazaunin unguwar da ya bukaci a sayaka sunansa, ya shaida wa cewa marigayiyar ta kasance mai auren-aure kuma wanda ake zargin ya kashe ta saurayinta ne tun kafin aurenta ya mutu.

“Al’amarin ya faru ne da misalin karfe 10:00 na daren jiya, wanda ya yi kisan saurayinta ne tun kafin ta yi aure, mijin nata ya sake ta suka ci gaba da soyayya da ita , yakan zo gidansu. “An kai ta asibitin UMC Zhair wanda bai fi kilomita daya da gidansu ba kuma a can ta rasu.”

Tuni kakakin ‘yansandan Jihar Kano, SP Abdullahi Haruna Kiyawa, ya tabbatar da faruwar lamarin, inda ya ce jami’ansu na bincike akan lamarin.

Kuma ya ce da zarar sun kammala bincike za su mika wanda ake zargi ga kotu.