Ya Fada Rijiya Yayin Da Yake Kokarin Jefa Mai Masa Aiki Don Yin Tsafi Da Shi

Wani magidanci ya fad a rijiya lokacin da ya yi yunkuruin tura mai aikin gidansa don yin tsafin kudi da shi a Jihar Kano.

Lamarin ya faru a Karamar Hukumar Kibiya da ke Jihar Kano.

• 2023: Muna tattaunawa da Peter Obi kan yiwuwar hada takararmu — Kwankwaso 
• Zulum Ya Amince Da Daukar Likitoci 40 Aiki Don Tura su Karkara

Fadawar Alhajin ya biyo bayan kammala aikin mutumin ne, inda shi Alhajin ya zo ganin aikin kuma ya ce ya yi.

Ashe da wata kullalliya a zuciyarsa, inda ya fakaici idon mai aikin ya barbada masa magani a idonsa ya kuma umarce shi ya sake shiga rijiyar don ya karasa kankare masa wani wurin a cikin rijiyar.

Ashe tun tashin farko shi mai hakar rijiyar ya ga lokacin da mai gidan yake barbada maganin.

Daga nan fa sai aka fara sa-in-sa da mai gidan da mai hakar rijiya, inda mai hakar rijiyar ya bijire wa umarnin mai gidan ya ki shiga rijiyar.

Ana cikin haka, sai Alhaji ya cukumi mai hakar rijiyar da nufin jefa shi ciki, shi kuwa Allah ya ba wa mai aikin sa’a ya jefa shi ciki.

Ko da ya jefa shi rijiyar kawai sai ya zama kudi nan take.

Bayan da ya ga haka, yana fitowa daga gidan sai ya garzaya ofishin ‘yan sanda ya sanar da su halin da ake ciki.