Yadda Aka Gudanar Da Maulidin Alhaji Bala Mai Salla Karo Na 21

Iyalan Alhaji Bala Mai Salla karkashin shugabancin Alhaji Sale Bala Mai Salla da shugaban kwamitin gudanar da maulidin, Alhaji Murtala Bala Mai Salla ta shirya gagarimin maulidi na jaddada farincikin da zagayowar haihuwar Manzon Allah (S.A.W) karo na 21 kamar yadda suka saba.

Taron maudilin ya gudana ne a harabar gidan Alhaji Murtala Mai Salla da ke Kano a daran Juma’ar da ta gabata. An dai gayyaci manyan malamai da saarakuna da sha’irai mawaka masu yabon Manzon Allah, da dai sauran al’umma.

• NUJ Kebbi Ta Yi Alhini Rasuwar Tsohon dan Jarida Ibrahim Argungu
• Hadin Farfesun Kifi Na Zamani

A jawabInsa, jagoran iyalan Alhaji Bala Mai Salla, Alhaji Sale Bala Mai Salla ya ce wannan ranace mai tasiri da farin ciki a gare su, domin gudanar da maulidin Ma’aikin Allah.

An yi wa maulidi da taken ‘kaunar Annabi shi ne yin aiki da kyawawan dabi’unsa kamar yadda Ma’aikin Allah ya koyar a aikace’, haka kuma an karanto tarihin Manzon Allah (S.A.W) da fadakarwa domin inganta soyayyarsa da kuma aiki da koyarwar addini musulunci daga bakin dinbin malami daban-daban da suka halarci wannan gagarimun maulidi.