Wasu mahara da ba a san ko su waye ba, sun jefa wani abin fashewa a hedikwatar jam’iyyar Action Peoples’ Party (APP) da ke birnin Fatakwal a Jihar Ribas.
Rahotanni sun ce babu wanda ya jikkata, amma harin ya lalata wasu sassan ginin hedikwatar jam’iyyar wanda ke yankin GRA a birnin.
- Kwanaki 11 Da Hawa Kujerar Mulki, Mataimakin Shugaban Iran Ya Yi Murabus
- Hukumar Kashe Gobara Ta Kano Ta Ceto Mutum 154 Da Kadarorin Naira Miliyan 80 A Watan Yuli
Harin na zuwa ne yayin da ake ta rade-radin cewa Gwamna Siminalayi Fubara na shirin komawa jam’iyyar ta APP.
Fubara ba sa ga maciji da tsohon gwamnan jihar kuma Ministan Babban Birnin Tarayya, Abuja Nyesom Wike.
Wike, ya taka muhimmiyar rawa a darewar Fubara karagar mulkin jihar karkashin jam’iyyar PDP, sai dai manyan ‘yan siyasar biyu sun samu sabani a baya-bayan nan.
Ya zuwa yanzu ana kokarin gudanar da zaben kananan hukumomi inda wasu suka danganta harin da zaben da ke tafe.
An ruwaito cewar wasu sassan rufin ginin ofishin jam’iyar ta APP sun lalace.
Bayanai sun yi nuni da cewa an kai harin ne da misalin karfe 3 na daren ranar Litinin.
Babu dai wanda ya dauki alhakin harin, amma mutane da dama na cewa ba zai rasa nasaba da takaddamar siyasa da jihar ke fama da shi ba.
