Yadda Matafiya 18 Suka Rasa Rayukansu Sakamakon Hadarin Mota A Neja

A kalla fasinjoji 18 ne suka rasa rayukansu sakamakon wani mummunar hadarin mota da ya rutsa da su daga Bida zuwa Minna.

Shaidun gani da ido sun bayyana wa manema labarai cewar wata mota bas kirar Bamba da ta fito daga hanyar Bida zuwa Minna, inda ta yi arangama da wata motar tifa da ta lalace kuma aka barta a tsakiyar hanya ba tare da sanya wata alama ba, motar matafiyan ta buga mata a baya sakamakon gudun da direban ke yi, inda nan take ta kama da wuta wanda ba wani fasinja har direban da ya samu tsira.

• ‘Yan Sanda Sun Ceto Matar Shugaban APC Na Jihar Neja Da Aka Sace A Borno

Lamarin ya faru ne a daren Asabar da ta gabata, inda aka yi jana’izar mamatan a wajen garin Gidan Mangwaro washe garin faruwar lamarin.

Kakakin rundunar ‘yan sanda na Jihar Neja, DSP Wasiu Abiodun, ya tabbatar faruwar lamarin, inda ya bayyana cewar fasinjoji 18 duk sun rasa rayukansu, kuma matafiya ne da suka fito daga Jihar Legas za su tafi Jihar Kano, inda lamarin ya rutsa da su.

Ya kara da cewa yanzu haka akwai mutum daya da lamarin ya rutsa shi yana kwance asibitin gwamnati yana karban magani.

Abiodun ya jawo hankalin direbobi musamman masu bin manyan hanyoyi da su tabbatar sun rika kiyaye ka’idar tuki domin kaucewa janyo hatsari ga matafiya. Ya ce wata tifar daukar yashi ce da ta lalace aka barta a kan hanya kuma ba wani alama ta janyo hadarin.