Yadda Muka Dakatar Da Yunkurin Tsige Ganduje Daga Shugabancin APC – Kungiyar Arewa Ta Tsakiya

Gamayyar kungiyoyi matasan Arewa ta tsakiya ce ta dakatar da fafutukar da ake yi ta neman tsige Dr. Abdullahi Umar Ganduje daga matsayinsa na shugabancin jam’iyyar APC.

Shugaban Gamayyar Kungiyoyin, Hon Abdullahi Sale Zazzaga ne ya bayyana hakan a wata hira da DCL Hausa ta yi da shi a ranar Laraba.

• Kasashe Fiye Da Dari Sun Ki Yarda Da Siyasantar Da Batun Hakkin Dan Adam 
• Xi Ya Aike Da Wasikar Taya Murna Ga Taron AIPPI Na Duniya Na 2024

Zazzaga ya ce, manyansu ne su ka ja hankalinsu domin su dakatar da wannan fafutuka musamman a yayin da taron kwamitin zartarwa na jam’iyyar ke karatowa.

Zazzaga ya ce, “Komai ana yi ne bisa dalili. Shi al’amari na siyaysa ana yin sa ne don neman ‘yanci, muna yin shi ne bisa dalili, dalilin kuwa shi ne, ci gaban yankinmu da al’ummarmu da zaman lafiyar al’ummarmu da bunkasar tattalin arzikinmu.

“Muna wannna fafutuka ne saboda ci gaban al’umma. Amma sai dai komai da mu ke yi muna da manya.”