A ranar Talata ne, Allah ya yi wa Alhaji Abbas Sanusi, Galadiman Kano kuma babban mai nada sarki a masarautar Kano rasuwa.
A safiyar Laraba, 2 ga watan Afrilun 2025 aka yi jana’izar sarkin wanda ya shafe fiye da shekaru 60 yana hidimtawa masarauta, ya rasu yana da shekara 92 bayan doguwar jinya. Ya bar ‘ya’ya da jikoki da dama.
- Mu Leka Shirin “Bunkasa Tagomashin Kirkirarriyar Basira Ta AI” Na Kasar Sin
- Tinubu Ya Yi Ta’aziyyar Rasuwar Galadiman Kano, Abbas Sanusi
Daga cikin ‘ya’yansa akwai Alhaji Abdullahi Abbas, shugaban jam’iyyar APC na jihar Kano.
Kano, jiha ce da hamayyar siyasa da rikicin masarauta ya dabaibaye ta. Akwai hamayyar siyasa tsakanin shugabannin jam’iyyun NNPP mai mulki a jihar da takwararta ta APC wacce Abdullahi Abbas kuma ɗa ga Galadima ke shugabanta a jihar.
A ɓangaren Masarauta, Gwamna Abba Kabir Yusuf ne ya tumɓuke Sarki Aminu Ado Bayero inda ya maye gurbinsa da Sarki Sanusi II, wanda yanzu haka suke gaban kotu.
Jana’izar Galadima da aka yi a fadar Kano, kofar kudu, ta hada kawunan duka bangarorin da ke hamayya da juna a jihar. Jiga-jigan Jam’iyyar NNPP a jihar da suka hada da shugabanta na Kasa, Engr. Rabiu Musa Kwankwaso, gwamna Abba Kabir Yusuf da sauransu duk sun halarci jana’izar yayin da a ɓangaren APC, Akwai shugaban jam’iyyar, Abdullahi Abbas, mataimakin shugaban majalisar dattawa, Sanata Barau Jibrin da sauransu. Sai dai, Sarki Aminu Ado Bayero bai samu halartar jana’izar ba duba da yanayin tsaro.
ADVERTISEMENT
