‘Yan Bindiga Sun Harbe Shugaban APGA Har Lahira A Ebonyi

Wasu ‘yan bindiga sun harbe shugaban jam’iyyar APGA na gundumar Ohofia Agba da ke karamar hukumar Ishielu a jihar Ebonyi, Hon. Monday Idoko.

LEADERSHIP ta tattaro cewa an harbe shi ne a kansa ne a kauyensa da ke Onueke a yankin Ohofia-Agba misalin karfe 11:00 na daren ranar Laraba.

• An Ba Da Rahoto Kan Gaskiyar Gibin Dake Tsakanin Matalauta Da Masu Arziki Mai Tsanani Na Amurka 
• Sin Ta Bukaci Amurka Da Ta Nuna Gaskiya Tare Da Gyara Kura-Kuranta

Wata majiya daga iyalan mamacin da ta yi magana da LEADERSHIP tare da neman a sakaye sunanta, ta ce, maharan sun shiga kauyen tare da kutsa kai cikin gidan marigayin, inda suka jawo shi lokacin da yake barci.

Wani mai goyon bayan jam’iyyar APGA a yankin wanda kuma ya bayyana cewa marigayi Idoko ya shagaltu da shirya ziyarar da dan takarar gwamnan Jihar Ebonyi na jam’iyyar APGA, Farfesa Benard Odoh ya kai a yankin, kafin kisan na shi.

Ya bayyana marigayin a matsayin matashi mai kwazo wanda ya sadaukar da rayuwarsa wajen yi wa jam’iyya hidima.

Idan za a iya tunawa a kwanakin baya ne aka kai wa tawagar dan takarar Gwamnan Jihar na jam’iyyar APGA, inda har aka kashe direbansa da wani dan sanda.

Kokarin jin ta bakin kakakin ‘yansandan jihar, SP Chris Anyanwu kan wannan lamarin ya ci tura.