Ƙungiyar ƙwallon ƙafa ta Wolverhampton Wanderers ta kori kocinta Vitor Pereira a yau Lahadi, 2 ga watan Nuwamba, bayan da ƙungiyar ta kasa samun nasara a wasanni goma na farko a gasar Firimiya ta bana. Pereira ya sanya hannu kan kwantiragin shekaru uku a watan Satumba, bayan ya taimaka wajen tabbatar da cewa Wolves ba ta faɗa zuwa gasar Championship a kakar da ta gabata ba.
Sai dai kuma, samun maki biyu kacal daga wasanni goma ya sanya shakku mai girma kan ikon Pereira na jan ƙungiyar zuwa tudun tsira. Rashin nasara da Wolves ta yi a hannun Fulham da ci 3-0 a ranar Asabar ya zama tamkar kwanan ƙarshe ga kocin. “Wolves ta rabu da kocinta Vitor Pereira bayan fara kakar wasa ta 2025/26 ba tare da wata nasara ba,” in ji sanarwar da ƙungiyar ta fitar.
- Shin Mene Ne Matsalar Liverpool A Wannan Kakar?
- Zuwan Tsoffin ’Yan Wasan Barcelona Abuja Ya Nuna Ana Samun Zaman Lafiya A Nijeriya – Matawalle
A kakar da ta gabata, Wolves ta ƙare a matsayi na 16, amma Pereira ya shiga cikin matsala bayan wasu muhimman ƴan wasa sun bar ƙungiyar. Matheus Cunha ya koma Manchester United, yayin da Rayan Aït-Nouri da Nelson Semedo suka tafi Manchester City da Fenerbahçe, lamarin da ya rage wa kocin zaɓin da zai iya dogaro da shi.
A farkon aikinsa, Pereira ya kasance abin ƙauna ga magoya bayan Wolves, inda ake ganin sa yana murna tare da su a mashaya kusa da filin wasan Molineux bayan samun nasara. Amma wannan soyayya ta dusashe a wannan kakar, inda aka samu sabon rikici tsakaninsa da magoya bayan ƙungiyar bayan rashin nasara a hannun Burnley a ƙarshen makon da ya gabata.
Yanzu dai hukumar gudanarwar Wolves na shirin neman sabon koci wanda zai iya farfaɗo da ƙungiyar kafin ta sake nutsewa cikin rikicin faɗawa daga Firimiya.
