‘Yan Bindiga Sun Yi Garkuwa Da Wata Mata Mai Juna Biyu A Jihar Kaduna

‘Yan Bindiga sun yi garkuwa da mai juna biyu a yankin Mando kusa da Makarantar sojoji (NDA) dake cikin jihar Kaduna.

Har ila yau, ‘yan Bindigar sun kuma sace wasu mutane bakwai a gidajen su da suka shiga da misalin karfe daya na daren ranar Lahadi.

• ‘Yan Bindiga Sun Yi Garkuwa Da Shugaban CAN Da Wani Fasto A Jihar Kaduna

An ruwaito cewa, daya daga cikin mazauna yankin, Musa Danladi ya sanar da cewa, dukkan mazauna yankin sun ji tsoron su fito daga gidajen su lokacin da ‘yan Bindigar suka zo yankin suna harbe-harbe a iska.

Danladi ya kara da cewa, ‘yan Bindigar sun zo yankin ne da misalin karfe daya na dare, inda suka yi garkuwa da mutane takwas ciki har da mai juna biyu wacce ta zo yankin domin ta duba mahaifiyarta wacce ba ta da lafiya.

“Wannan shine, shigowar ‘yan bindigan na farko zuwa yankin” inji shi.

Sai dai, har yanzu Gwamnatin jihar ba ta yi wani jawabi kan lamarin ba, haka kakakin rundunar ‘yan Sanda na jihar DSP Mohammed Jalige, Shima bai fitar da wata sanarwa kan harin na ‘yan Bindigar ba.