‘Yan Fashin Daji Sun Kashe Mutum 4, Da Sace 18 A Harin Da Suka Kai A Wani Kauye A Sokoto

Rundunar ‘Yansandan jihar Sokoto ta tabbatar da kai wani hari da ‘’Yan bindiga suka kai a kauyen Giyawa na karamar hukumar Goronyo da ke jihar.

Kakakin rundunar ‘Yansandan jihar, ASP Ahmed Rufai, ya tabbaar da hakan kai harin.

• ‘Yan Bindiga Sun Yi Wa Manoma Mummunar Kisa A Gonakansu A Sokoto
• ‘Yan Bindiga Sun Kashe 14, Sun Yi Garkuwa Da 81 A Sokoto Da Katsina

An tabbatar da mutuwar akalla mutane hudu da kuma sace mutane 18 tare da yin awon gaba da sauran kaya masu tsada ciki har da dabbobi.

Kakakin rundunar ‘Yansanda ya ce, mutum bakwai cikin wadanda lamarin ya ritsa da su sun arce wa daga hannun ‘’Yan bindigar, inda tuni suka dawo matsagunansu da ke cikin kauyen.

A cewarsa, ‘yan sanda na ci gaba da yin kokari domin cafke ‘yan bindigar, inda ya kara da cewa, a yanzu komai ya lafa a kauyen da ‘yan bindigar suka kai harin.

Amma wasu majiyoyi a kauyen sun yi ikirarin cewa, sama da mutane 30 ne ‘yan bindigar suka sace, inda a bangaren rundunar ta hakikance cewa mutum 11 ne kacal a hannun ‘yan bindigar.