‘Yan Sanda Sun Yi Raga-raga Da Maboyar ‘Yan Ta’adda, Sun Cafke 13 A Adamawa

Rundunar ‘yan sandan jihar Adamawa ta yi Raga-raga da wata maboyar ‘yan ta’adda, tare da kama mutane 13, kuma ta kwato makamai da dama da sauran kayayyaki.

Daga cikin makaman da aka kwato yayin samamen akwai; Bindigar AK47 guda daya, bindiga kirar gida guda biyu, harsashi har guda 24, kayan soja, babura uku da kudi Naira 358,500.

• ‘Yan Sanda Sun Kashe Dan Bindiga, Sun Kwato AK-47 A Zamfara

Kwamishinan ‘yan sandan jihar, S.K Akande ne ya sanar da hakan ga manema labarai yayin wata ganawa da manema labarai da aka gudanar a rundunar ‘yan sandan jihar Adamawa a ranar Litinin.

Ya ce rundunar ta yabawa jama’a kuma ta bada tabbacin cewa za a gurfanar da duk wadanda ake zargin da zarar an kammala bincike.

Kwamishinan ya ci gaba da cewa rundunar ‘yan sandan ba za ta yi kasa a gwiwa ba wajen farautar ‘yan ta’adda har sai an kama su kuma a gurfanar da su a gaban kotu.