‘Yan Sintiri Sun Kashe ‘Yan Bindiga 12 A Jihar Taraba

Al’umma a Jihar Taraba na cike da murna, musaman wadanda suke zaune a karamar hukumar Bali biyo bayan da ‘yan sintiri suka hallaka wasu ‘yan bindiga da suka jima suna addabar al’ummar jihar.

An ruwaito cewa, ‘yan sintirin sun fita ne farautar su, inda suka samu nasarar kashe su.

• Mai Gida Ya Kashe ‘Yar Hayar Gidansa Da Wuka A Ondo
• EFCC Ta Kwato Motoci 15 Da Na’u’rori Daga Hannun Masu Damfarar Yanar Giolzo A Wari

Shugaban karamar hukumar Micah D. Dakka, a hirar da aka yi da shi ta waya, ya tabbatar da faruwar lamarin.

Dakka, ya yaba da kokarinsu, inda ya kara da cewa, wannan nasarar za ta taimaka wajen cafko sauran ‘yan bindigar da ke addabar al’ummar jihar baki daya.

Shugaban ya ce “‘Yan bindigar an koro su ne daga karamar hukumar Gassol da ke makwabta da karamar hukuma Bali.

Ya kara da cewa “Hukumomin tsaro da sauran jama’a na gari a karamar hukumar, ba za su gajiya wajen ci gaba da bai wa jami’an tsaro goyon baya don a kakkabe ‘yan bindiga baki daya a yankin.”

Ya yi kira ga daukacin alummar yankin da su taimaka wa da jami’an tsaro da sahihan bayanai don su cafko sauran ‘yan bindigar a yankin.