‘Yan Ta’adda Sun Sake Kai Wa Tawagar Jami’an Tsaron Shugaban Kasa Farmaki

Kimanin sa’o’i 24 da ‘yan ta’adda suka yi barazanar yin garkuwa da shugaban kasa Muhammadu Buhari da gwamnan Kaduna Nasir El’Rufai a wani faifan bidiyo, wasu ‘yan bindiga dauke da makamai sun yi wa sojojin Guards Brigade kwanton bauna a Abuja.

Sojoji uku ne suka jikkata yayin harin wanda ya jefa mazauna birnin tarayya cikin firgici.

• NNPP Ga Buhari: Ka Sanya Dokar Ta Baci A Jihohin Arewa 5

A wani rahoton da the Nation ta bayar, ta ce ‘Yan bindigar sun nufi makarantar koyon shari’a ta Nijeriya da ke Bwari ne a lokacin da suka ci karo da sojojin suna sintiri.

Akwai rahotannin sirri, kamar yadda majiyar sojoji ta bayyana, ‘yan ta’addan sun mamaye babban birnin tarayya, Abuja da nufin kai hari a makarantar koyon aikin Shari’a da ke Bwari da wasu cibiyoyin gwamnati.

Majiyoyin soji da suka nemi a sakaya sunansu sun ce harin na nuni da cewa ‘yan ta’addan sun mamaye birnin amma hukumomi sun ce suna kan bibiyan sahun maharan.

A cewar daya daga cikin majiyoyin, yace ‘yan ta’addan sun yi wa dakarun rundunar bataliya ta 7 dake sintiri a kan hanyar Kubwa zuwa Bwari kwanton bauna ne.

Ya kara da cewa sojoji uku ne suka jikkata yayin harin kuma an kwashe su zuwa asibitin THE domin kula da lafiyarsu.