Yanzu-yanzu: JUSUN Ta Dakatar Da Yajin Aikin Da Fara A Faɗin Ƙasa Baki Ɗaya

Kungiyar ma’aikatan shari’a ta Nijeriya (JUSUN) ta dakatar da yajin aikin da ta fara a fadin kasar a ranar Litinin.

An sanar da dakatarwar ne a cikin wata sanarwa da aka fitar a ranar Talata, bayan wani muhimmin taro da aka yi tsakanin shugabannin kungiyar da wakilan Alkaliyar Alkalan Nijeriya (CJN), Mai shari’a Kudirat Kekere-Ekun.

• Darajar Hajojin Da Aka Yi Jigilarsu a Kasuwar Sin Daga Watan Janairu Zuwa Na Afrilu Ta Karu Da 5.6% 
• Shehu Sani Ya Buƙaci Shugabannin Arewa Su Mara Wa Tinubu Baya Ya Yi Shekaru 8 A Kan Mulki

Taron wanda ya hada da manyan masu ruwa da tsaki da suka hada da Ministan Kwadago da Aiyuka, Muhammad Dingyadi da Kungiyar Kwadago ta Nijeriya NLC ya cimma nasarar dakatarwar bayan shafe tsawon lokaci ana tattaunawa kan bukatun JUSUN.

A cikin sanarwar da dukkan bangarorin da suka halarci taron suka sanya wa hannu, an amince da cewa, kungiyar za ta ba da wata guda domin tattauna bukatun JUSUN.

Wani bangare na yarjejeniyar ya bukaci Gwamnatin Tarayya ta saki kudaden da suka wajaba ga bangaren ma’aikatan shari’a a cikin wannan watan.

Sanarwar ta jaddada cewa, da zarar an fitar da kudaden, dole ne a aiwatar da duk wasu bukatu da kungiyar ta JUSUN ta gabatar ba tare da bata lokaci ba.