Yau Talata, kungiyar masu jigilar kayayyaki da sayayya ta kasar Sin ta gabatar da alkaluman watanni 4 na farko na bana, wadanda suka nuna cewa, a watan Afrilu, sha’anin jigilar kayayyaki ya bayyana inganci da boyayyen karfi, kuma duk da kalubaloli da matsin lamba daga ketare da aka fuskanta, ya tafi yadda ya kamata tare da samun bunkasuwa. Kana daga watan Janairu zuwa na Afrilu, darajar hajojin da aka yi jigilarsu a kasar ta kai dalar Amurka triliyan 16, wadda ta karu da kashi 5.6 cikin kashi 100 bisa na makamancin lokaci a bara.
Kazalika, yawan hajojin da aka yi jigila yana cikin wani yanayi mai dorewa, bisa la’akari da yadda jigilar kayayyaki ta amfani da layin dogo da hanyoyin mota ke tafiya yadda ya kamata, kana ana samun saurin bunkasuwar jigilar kayayyaki da ta hada mabambantan hanyoyi. Alkaluman sun kuma nuna cewa, daga watan Janairu zuwa na Afrilu, yawan hajojin da aka yi jigila ta hanyar layin dogo ya karu da kashi 3.6 cikin kashi 100 bisa na makamancin lokacin a bara, adadin na hanyoyin mota ya karu da kashi 5 cikin kashi 100, kana yawan kwantanonin da aka yi jigilar su ta amfani da jirgin kasa da na ruwa tare, ya wuce miliyan 5.38, wanda ya karu da kashi 19.1 cikin kashi 100 bisa na makamancin lokacin a bara. Nauyin yawan sakwanni da aka yi jigila ya kai fiye da ton miliyan 3, adadin ya karu da kashi 13 cikin kashi 100 bisa na makamancin lokacin bara. (Amina Xu)
