Zaɓen Cike Gurbi: An Fara Tantancewa Da Kaɗa Ƙuri’a A Adamawa

An fara gudanar da zaɓen cike gurbi na majalisar dokokin jihar Adamawa cikin kwanciyar hankali a ƙaramar hukumar Ganye, inda kayan zaɓe suka iso da wuri, kuma tantancewa da kaɗa ƙuri’a suka fara a lokaci guda a rumfunan zaɓe da dama.

Jami’an hukumar zaɓe ta ƙasa (INEC) sun gudanar da aikin tantance masu zaɓe a wurare da dama, inda aka samu taron jama’a tun da wuri a rumfunan Fadar Gangwari, da Sanga-sumi, da Kangaraso, da kuma Anguwan Leko.

• INEC Ta Gargaɗi Ƴan Siyasa Kan Azarɓaɓin Yaƙin Neman Zaɓen 2027
• Gwamnonin Nijeriya Sun Yi Ta’aziyyar Waɗanda Suka Rasu A Ambaliyar Ruwa A Adamawa

Zaɓen ya biyo bayan rasuwar tsohon ɗan majalisar dokokin jihar, Hon. Abdulmalik Jauro Musa na jam’iyyar APC, wanda yake wakiltar mazabar Ganye a majalisar.

Sai dai duk da haramcin zirga-zirga da aka saka, an lura da wasu ƴan kasuwa suna buɗe shaguna a kasuwar Doya, yayin da aikin zaɓe ke ci gaba da gudana lafiya.