Kakakin ma’aikatar harkokin wajen Iran, Nasser Kanani, ya mika sakon ta’aziyya kan mutuwar shugaban Hamas, Ismail Haniyeh, inda ya bayyana shi a matsayin cin zarafi.
A cewar shafin Intanet na ma’aikatar, Kanani ya bayyana cewa za su dauki fansa kan kisan da aka yi wa Haniyeh.
- Dangote Da BUA Za Su Bayyana A Gaban Majalisa Kan Badakalar Haraji
- An Kashe Shugaban Hamas, Ismail Haniyeh A Tehran
Ya ce Iran tana gudanar da bincike amma mutuwarsa za ta kara karfafa dangantaka tsakanin Iran da Falasdinawa.
Idan ba a manta ba da safiyar ranar Laraba ne, kungiyar Hamas ta ce an kashe shugabanta, Ismail Haniyeh a birnin Tehran na Iran.
Wata sanarwa da kungiyar ta fitar, ta ce an kashe Haniyeh ne a gidansa da ke Tehran, a ziyarar da ya kai domin halartar bikin rantsar da sabon shugaban Iran, Masoud Pezeshkian.
Kungiyar Falasdinawan mai rike da iko a Gaza ta ce Isra’ila ce ta kashe shugaban nata, m yayin da yake halartar rantsar da sabon shugaban Iran.
Kungiyar Hamas ta bayyana kisan a matsayin babban laifi wanda martaninsa ba zai zo da dadi ba.
Ta kuma ce Isra’ilan ta kashe daya daga cikin masu tsaron lafiyar Haniyeh, a lokacin samamen da ta kai.
