Zabe: ‘Yan Siyasa Sun Boye Tsofaffin Kudi Sama Da Biliyan 500 Ba Su Mayar CBN Ba – Bawa

Shugaban Hukumar Yaki da masu yi wa Tattalin Arzikin Kasa Ta’annuti (EFCC), Abdulrasheed Bawa, ya ce, har yanzun akwai sama da Naira biliyan 500 da ‘yan siyasa suka boye, ba su koma babban bankin Nijeriya (CBN) ba.

Abdulrasheed Bawa ya bayyana haka ne a wata hira da gidan talabijin na Channels TV a wani shiri mai taken ‘Siyasa a yau’.

• Buhari Da Tsofaffin Shugabannin Kasa Sun Bukaci ‘Yan Takara Su Karbi Sakamakon Zabe

Shugaban na EFCC ya kara da cewa, hukumar na da bayanai da dama kan wasu hanyoyin da ‘yan siyasa ke tsarawa na sayen kuri’u a lokacin zabe.

Ya ce, “Zabin da ya rage wa ’yan siyasa kadai a yanzu shi ne, su siya kuri’u, domin na’urar BVAS za ta bayar da mamaki da yawa.”

Wannan shi ne bayanin sirrin da muke da su, kuma ina farin ciki da cewa dukkan hukumomin tsaro sun dukufa wajen ganin an gudanar da zaben cikin nasara.