Tambaya:
Assalamun alaikum, malam ko ya halatta na yiwa Mahaifina Layya bayan ya mutu don kawai na kyautata masa?
Amsa:
Wa alaikumus salam Ya halatta ka yi masa, saboda sadaka ce, sadaka kuma ta halatta ga mamaci, zai kuma iya samun ladanta, saboda hadisai sun tabbatar da cewa mamaci yana iya amfana da sadakar da rayayye ya masa.
Amma ba’a son dawwama akan hakan, saboda bai inganta Annabi (SAW) ya yiwa wani matacce shi kadai Layya ba, ya kasance yana mutukar son Hamza baffansa, amma bayan an kashe shi, bai taba yi masa Layya ba, saidai yakan yi Layya ga Ahalin gidansa da wanda bai yi layya ba daga cikin Al’umarsa.
Don neman karin bayani duba Bada’i’ussana’iu 5/72 da kuma madalibu ulinnuhaa 2/472
Mai Takaba Zata Iya Fita Sallar Idi?
Tambaya:
Assalamu alaikum warahmatullah, Barka da war haka. Don Allah YA halatta me takaba ta je sallar Eid?
Amsa:
Wa’alaikum assalam, Bai halatta ga mai takaba ba ta fita zuwa Idi, saboda Hadisin Ibnu Majah Mai lamba ta: (2031) inda Annabi S.A.W yake cewa da Furaia lokacin da mijinta ya Rasu: (Ki zauna a cikin gidan da kika samu labarin mutuwar mijinki har zuwa Ki kammala iddarki”
Hadisin da ya gabata yana nuna cewa: Mai takaba ba za ta fita ba sai in akwai lalura, sallar idi kuma ba ta cikin lalorori a shari’a.
Imamu Ashshaukani a cikin Nailul Audaar 3/343 ya yi bayani cewa “Dukkan Mata ana fitar da su daga gidanjansu Don su halarci idi, in ban da wacce take iddar mutuwa”.
Allah ne mafi San
Fatawar Rabon Gado (34)
Tambaya:
Assalamu alaikum warahmatullah Dr. Dan Allah zan iya yin wasiyya ga kanina ya hakura da gadona dan mata ta tayi amfani da shi, Domin na san kanin ba zai kula da Matar tawa ba Idan na mutu?.
Amsa:
Wa alaikum assalam, wanda za’a gada ba shi da ikon hana magajinsa gado. Allah madaukakin sarki shi ne ya dauki nauyin raba gado ga wadanda suka can canta da kansa,ya kuma yi alkawarin narkon wuta ga dukkan wanda ya sabawa dokokin da ya sa na rabon gado a aya ta: 14 a suratun Nisa’i. Mutukar kaninsa yana cikin magada ba shi da ikon hana shi, ko da ya yi wasiyya, ya wajaba alkali ya bata ta. Dukiya tana zama mallakin magada daga zaran an tabbatar da mutuwar mamaci. Idan har kanin naka ya sarayar da hakkinsa da kansa, to babu laifi tun da damarsa ce.
Allah ne mafi sani.
Zan Iya Yi Wa Mamaci Aikin Hajji?
Tambaya:
Assalamu alaikum wa rahmatullah, Malam Barka da dare, Malam ina tambaya ne dangane da wakilci a aikin hajji (Anniyaabatu anil mayyit), mahaifina yana son yiwa wani daga cikin makusantan shi da ya rasu; sai wani mutum (malami) yake ce masa ai akwai addu’ar da ake yi (kul huwal laahu sau wani adadi dss) wadda tafi wannan aikin hajjin da za ai masa!!
To dan Allah Malam yana so ne yaji shin hakan ya tabbata, kuma dai-dai ne? , ko akwai wani Malami da ya fadi hakan?
Amsa:
Wa alaikum assalam,Ba haka ba ne, wannan maganar ba ta da asali, Yiwa wani hajji ya tabbata a hadisai, wani mutum ya tambayi Annabi (s.a.w) cewa: “Babana ya mutu bai yi hajj ba, zan iya yi masa?, sai Annabi (s.a.w) ya ce yaya kake gani Idan da bashi ya bari za ka biya masa?,sai yace E,sai Annabi (s.a.w) yace to ai bashin Allah shi ya fi cancanta a biya, don haka ka yi masa hajji, kamar yadda Ibnu Taimiyya ya rawaito a Muntaka a hadisi mai lamba ta: 1797, da kuma Darakudni.
Sannan Kathamiyya ta tambayi Annabi (s.a.w) cewa : Hajji ya riski babanta yana tsoho za ta iya yi masa? sai Ya ce E, kamar yadda Bukari ya rawaito a hadisi mai lamba ta ; 1756.
Malaman fikhu sun kafa hujja da Wadannan hadisan tabbatattu akan halacci ko wajabcin yiwa mamaci ko Wanda ba zai iya ba aikin hajji Idan yana da halı.
Hajji ibada ce mai zaman kanta,kuma daya daga cikin ginshikan musulunci babu yadda za’a yi wata addu’a ta zauna a makwafinta.
Zan Iya Shan Maganin Tsayar Da Haila Saboda Aikin Hajji?
Tambaya:
Assalamu alaikum. Tambaya gare mu kamar haka: Ya halatta mace ta tsayar da jinin haila saboda hajj??
Amsa:
Wa’alaykumussalam. To, ‘Yar uwa ya halatta, mutukar likita ya tabbatar miki ba zai cutar da ke ba, sai dai tsayawa a Dabi’ar da Allah ya halicce ki akai shi ya fi kyau, saboda shan magunguna irin wadannan yana birkita kwanakin al’ada, kamar yadda bincike ya tabbatar.
Allah ne mafi sani.
Fatawar Rabon Gado (35)
Tambaya:
Assalamu alaikum warahmatullah. Da fatan Malam yayi Sallah lafiya, Allah ya karbi ibadun mu amin. Malam ina da tambaya akan rabon gado ne: Mace ta rasu ta bar Iyayen ta 2 da kuma mijin ta da ‘ya’ya 7. Maza 4 mata 3 ta bar kuma dukiyar kudi # 200,000 ya rabon gadon zai kasance? Pls Malam na san kana da ayyuka da dama amma a taimaka a amsa min. Allah ya kara fasaha.
Amsa:
Wa’alaikum assalam, za’a raba abin da ta bari gida:12, sai a bawa mijinta kashi :3, a bawa babarta kashi:2, babanta kashi:2, ragowar kashi biyar din sai a bawa ‘ya’yanta su raba, duk namiji zai dau rabon mace biyu.
Allah ne mafi sani.
Hukuncin Matar Da Ta Yi Aure A Kan Aure Kafin A Saketa
Tambaya:
Assalamu alaikum Maalam. Mace ce aka aurar tana ‘yar-shekara 14 ga wanda bata so, to sai mijin ya yi tafiya har tsawon wata hudu (4) To sai matar tasa aka rubuta mata saki tace ya saketa, bayan ya dawo ya ce bai saketa ba, amma ba’a yarda ba. Da ta kare idda ta yi aure da wani har suka haihu, daga baya kuma suka rabu, kuma yanzu ta ga musifu suna ta samunta, sai take tunanin ko wancan abin ne da ta yi. Tana neman fatawa, ina hukuncin ta, da yaran da ta haifa da miji na biyu?
Amsa:
Wa’alaikum assalam Malam amsar wannan tambaya yana da mutukar wahala, saidai na nemi taimakon wasu daga cikin malamaina, ga abin da na samo:
1. Abin da ta yi mummuna ne a shari’ar musulunci saboda ta yi aure cikin aure.
2. Zaman da su ka yi da mijinta na biyu, a matsayin mazinaciya take, saboda haka duk kwanciyar da suka yi da wannan mijin na ta zina ne.
3. Yaran da su ka Haifa da mijnta na biyu, ‘ya’yansa ne, tun da bai san abin da ya faru ba a baya.
4. Har yanzu igiyar aurenta ba ta warware ba tsakaninta da mijinta na farko, saboda haka har yanzu ita matarsa ce saidai in ya sake ta.
5. Mijinta na farko, zai iya dawowa da ita, ba tare da sake daura aure ba, saidai dole sai bayan ta tuba, domin ita a matsayin mazinaciyya take, kuma Allah ya hana auren mazinaciya.
6. Ya wajaba a gare ta ta yawaita istigfari saboda girman zunubin da ta aikata.
7. Zai yi kyau su je wajan Alkali wanda ya san shari’ar musulunci, domin ya yi musu hukunci.
Allah ne mafi sani.
Mace Za Ta Iya Aske Gashin Kanta?
Tambaya:
Assalamu alaikum. Malam gashin matata ne yake karyewa, musamman in tazo tajewa dayawa yana fita. Shi ne tace tana son ta aske don sabo yafito
Amsa:
Wa alaikum assalam, ya haramta ga mace ta aske gashin kanta saboda hadisin da Tirmizi ya rawaito cewa: “Annabi S.A.W. ya hana Mace ta aske gashin kanta”.
Idan Mace ta aske gashin kanta zai zama ta Yi kama da Maza, Allah kuma ya La’anci macen da take kamaceceniya da maza kamar yadda ya zo a cikin hadisi.
Wasu malaman sun halattawa Mace ta aske gashin kanta don wani sabon gashin ya fito, idan wata lalura ta same ta kamar KORA ko kwakuyewar Kai, Ibnu Uthaimin ya ambata hakan a Fataawaa Nurun aladdarb 10/13 sannan Athram ya hakaito kwatankwacin wannan fatawar daga Imamu Ahmad.
Allah ne mafi sani
Fatawar Rabon Gado (36)
Tambaya:
Assalamu alaykum’ Allah ya gafarta malam dan’uwanmune ya rasu ba shi da Mata ba shi da ‘ya’ya, mahaifiyarsa tana nan yana da yar’uwa mace uwa daya uba daya, mukuma ubanmu daya, shin muna cikin masu gado? Allah ya sakawa malam da alkhairi.
Amsa:
Wa alikum assalam, Za’a raba abin da ya bari gida:6, sai a bawa mahaifiyarsa kashi:1, ‘Yar’uwarsa shakikiya kashi:3, ragowar sai a baku ‘yan’uba ku raba, duk namiji ya dau rabon mata biyu.
Allah ne mafi sani.
