Ɗan Sarkin Gobir Da Aka Kashe Ya Kuɓuta Daga Hannun ‘Yan Bindiga

An samu karin haske kan kisan da aka yi wa hakimin Gatawa da ke karamar hukumar Sabon Birnin Jihar Sakkwato, Alhaji Isa Muhammad Bawa Gobir.

Da yake tabbatar da hakan ga wakilinmu, dan majalisa mai wakiltar Sabon Birni ta Arewa a majalisar dokokin jihar, Honorabul Almustapha Boza, ya ce, tawagar da aka aika domin kai kudin fansa da ‘yan bindigar suka nema gawarsa kawai suka gani.

• An Kashe ‘Yan Bindiga Da Dama A Wani Artabu Da Sojoji A Filato
• An Kaddamar Da Shirin The Bond Karo Na Biyar A Kasar Masar

Dan majalisar a wata tattaunawa ta wayar tarho da yammacin ranar Laraba, ya bayyana cewa tawagar sun dawo ne kawai tare da dansa yayin da tuni aka binne hakimin gundumar kafin su isa wurin ‘yan bindigar.

“Eh, zan iya tabbatar muku da cewa, Hakimin ya mutu, sun kashe shi, har wadanda suka je wajen domin kai kudin fansa ba su hadu da shi a raye ba, sai kawai suka dawo tare da dansa da aka yi garkuwa da shi tare.”

Idan dai za a iya tunawa, dan majalisar tun da farko a lokacin da yake zantawa da wakilinmu ya ce, “Mun amince da Naira miliyan 60 da kuma sabbin babura a matsayin kudin fansa, abin da ya kawo jinkiri shi ne, irin baburan da aka nema wanda aka fi sani da Boko Haram.”