Rundunar Ƴansandan jihar Kano ta tabbatar da gano bama-bamai tara da basu fashe ba (UXOs) a wurin da fashewar da ta yi sanadin mutuwar mutane biyar ta faru a Kamfanin Yongxing Steel da ke unguwar Mariri a kan titin Ring Road.
Fashewar da ta faru da karfe 11:30 na safe ranar 21 ga watan Yuni ta kashe mutane biyar tare da jikkata wasu da dama.
- Abba Ya Dace Ya Zama Gwamnan Kano Na Har Abada Ba Shekaru 8 Kaɗai Ba – Arch Ali Hassan
- Mun Gano Wurare 52 Da Ake Aikata Laifuka A Kano – Janar Mai Adda’u
Mai magana da yawun Ƴansandan jihar, DSP Hussaini Abdullahi, ya bayyana cewa binciken da sashin EOD-CBRN ya gudanar ya nuna cewa fashewar ta faru ne sakamakon wani bam da aka yi amfani da shi a yaƙi (UXO) wanda ya fashe ba da gangan ba yayin sauke tarkacen karafa.
“Binciken ya nuna cewa fashewar ta fito ne daga wani bam da aka yi amfani da shi a yaƙi (UXO), ba wanda aka kera da hannu (IED) kamar yadda aka fara zato ba,” in ji sanarwar. “An gano bama-bamai tara iri ɗaya daga wurin.”
Kwamishinan Ƴansandan jihar, CP Ibrahim Adamu Bakori, ya yi ta’aziyya ga iyalan waɗanda suka rasu, ya kuma yi fatan waɗanda suka jikkata da su samu sauki.
Ƴansandan sun kuma yi kira ga jama’a da su nuna fahimta, suna masu cewa babu wata barazana ta tsaro a halin yanzu, kuma sun nemi da a kai rahoton duk wani abu ko aiki da ake zargi.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
