Gwamnatin Kano Ta Amince A Rushe Gine-Ginen Da Suka Haddasa Ambaliyar Ruwa A Kantin Kwari

Majalisar Zartarwar Jihar Kano ta amince tare da bayar da umarnin gaggawa na  rushe duk wasu gine-gine  da aka yi akan magudanun ruwan kwarin Gogau da ta haddasa ambaliyar ruwa a Kano.

Haka kuma an tabbatar da binciko tare da rushe duk wani gini da aka yi a kan magudanun ruwan da suka zagaye kasuwar Kantin Kwari dominn bai wa ruwa damar kwaranyewa a yankin.

• Dambu Ya Yi Ajalin Mutane 7 ‘Yan Gida Daya A Sakkwato 
• Yadda Bidiyon Tsiraicina Ya Karade Shafukan Sada Zumunta – Safara’u

Kwamishinan Ma’aikatar Yada Labaran Jihar Kano, Malam Muhammad Garba, ne ya bayyana haka ga manema labarai jim kadan bayan kammala taron Majalisar Zartarwar da aka gudanar a dakin taron fadar gwamnatin Kano.

Da yake karbar rahoton kwamitin gaggawa kan ambaliyar ruwan kasuwar Kantin Kwari wanda Kwamishinan, Ma’aikatar Ayyuka da Tsare-Tsare, Injiniya Idris Wada Saleh,  da na Ma’aikatar Muhalli, Dakta Kabiru Ibrahim Getso, zaman majalisar zartarwar ya ba da umarnin rushe duk wasu gine gine-ginen wucin gadi da aka yi a zagayen kasuwar da cikinta nan ta ke.

Haka kuma, majalisar zartarwar ta kuma zartar da cewa a gaggauta kawar da duk wasu abubuwan da ke toshe magudanun ruwa da ke cikin kasuwar da zagayenta, tare da dauke duk wasu kayan gine-gine  da aka ajiye a kan magudanun ruwan da ke cikin kasuwar.