Sojoji Sun Kashe ‘Yan Bindiga 40 A Zamfara

Rundunar sojin sama da na kasa na Operation Hadarin Daji sun samu gagarumar nasara bayan da suka yi nasarar kashe ‘yan ta’adda sama da 40 akan babura a kauyen Malele da ke karamar hukumar Dansadau a jihar Zamfara.

An kai harin ne a ranar Asabar din da ta gabata a wani harin hadin gwiwa mai nasara tsakanin rundunar sojojin sama (NAF) da na kasa na sojojin Nijeriya, kamar yadda majiyoyi suka bayyana.

• Jami’an Tsaro Sun Hallaka ‘Yan Bindiga Da Masu Garkuwa Da Mutane 12 A Bauchi

LEADERSHIP ta tattaro cewa, a cewar mazauna yankin, an samu kuskuren kashe wasu daga cikin mazauna yankin yayin farmakar ‘yan bindigar dajin dake yankin.

Wata majiyar soji ta bayyana yadda hedikwatar tsaro ta rarraba jami’anta wajen kai hare-hare da jiragen sama kan ‘yan fashin da ke addabar jama’a daga sassa daban-daban na kasar nan.