Mai koyar da ‘yan wasan kungiyar kwallon kafa ta Arsenal Mikel Arteta, ya ce za su shiga kasuwa a watan Janairu, biyo bayan raunin dan wasan gaban su Gabriel Jesus.
Jesus ya ci wa Arsenal kwallaye biyar ya kuma taimaka aka ci shida a kakar bana a gasar Premier League kafin aje hutun gasar cin kofin duniya da aka kammala a kasar Qatar.
- Hada Rubutu Da Karantarwa Ne Babban Kalubalen Da Nake Fuskanta -Amira Sule
- Nijeriya Za Ta Fara Fitar Da Shinkafa Zuwa Masar
Sai dai dan wasan mai shekaru 25 a duniya ya samu rauni a lokacin da yake wakiltar kasarsa Brazil a gasar kofin duniya, inda tuni aka yi wa Jesus aiki, kuma zai shafe lokaci kafin ya dawo fili.
A cewar Arteta, an yi masa aiki kuma hakan ya isa ya sa a fahimci munin raunin da ya samu, saboda haka za su shiga kasuwa su sa yi wanda suke ganin zai iya maye musu gurbinsa.
Ya kara da cewa rashin Jesus saboda raunin da ya samu babban cikas ne ga kungiyar wadda a halin yanzu da kungiyar take mataki na daya a kan teburin gasar, bayan buga wasanni 16. Arteta ya ce abu ne mai wahala ya iya bayyana lokacin da Jesus zai murmure bisa la’akari da munin raunin da ya samu.
A ranar Talata Arsenal ta doke West Ham United daci 3-1 a wasan firimiya a filin wasana Fly Emirates, matakin da ya sa ta ci gaba da zama a saman teburin gasar ta kasar Ingila.
