Kotu Ta Daure Matashi Shekaru Uku Da Rabi Kan Aikata Fyade A Kwara

Wata Kotun Majistare da ke Kaiama a Jihar Kwara ta yanke wa wani mutum mai suna Hussain Kamilu dan shekara 35 hukuncin daurin shekara uku da rabi a gidan yari bisa samunsa da laifin yi wa wata yarinya ‘yar shekara 15 fyade, Mariam Suleiman.

Jami’an hukumar tsaro ta farin kaya (NSCDC) dake Kaiama ne suka kama wanda ake zargin a ranar 2 ga Afrilu, 2023, biyo bayan korafin da Mariam ta kai ma Jami’an na cewa yayi mata fyade a ranar 1 ga Afrilu, 2023.

• Gwamnati Ta Zargi Peter Obi, Baba-Ahmed Da Cin Amanar Kasa

Bayan gurfanar da Kamilu a gaban kotu a ranar Talata, Alkalin kotun Mai shari’a Abubakar Boro ya yanke masa hukunci.

Mutumin da aka yanke wa hukuncin zai zauna ne a gidan yarin New Bussau da ke jihar Neja.

A Wata sanarwa da mai magana da yawun hukumar NSCDC a jihar Kwara Ayeni Olasunkanmi ya fitar, ya ce wanda ake tuhumar ya aikata laifin ne a kauyen Adogo da ke karamar hukumar Kaiama a jihar.