Saboda Ziyarar Tinubu, Wike Ya Ba Da Hutu, Ya Umarci Rufe Kasuwanni

Gwamnan jihar Ribas, Nyesom Wike, ya ayyana ranar Laraba a matsayin ranar hutu domin jama’ar jihar Ribas su tarbi zababben shugaban kasa, Bola Ahmed Tinubu tarba mai kayartawa.

Zababben shugaban kasar, a yayin ziyarar aiki ta kwanaki biyu da zai yi a jihar Ribas, zai kaddamar da gadar Rumuola/Rumuokwuta da babbar kotun Majistare ta Fatakwal a ranakun Laraba da Alhamis.

• Nijeriya Za Ta Yi Koyi Da Salon Ci Gaban Kasar Sin, In Ji Wani Jami’in Kasar

Wike, a wani labarai a jihar a ranar Talata, ya ce yayin ziyarar yakin neman zaben shugaban kasa da Tinubu ya kai jihar Ribas, na nuna sha’awar bawa Tinubu damar kaddamar da wasu manyan ayyuka a jihar bayan babban zabe.

Wike ya ce, an aikewa da zababben shugaban kasa takardar gayyata bayan kammala babban zabe, wanda kuma shugaban ya amsa gayyatar cikin yardarsa.