Rundunar ‘yansandan jihar Ribas ta tabbatar da sace wasu ‘yan hidimar kasa (NYSC) wadanda har yanzu ba a tantance adadinsu ba akan titin Gabashi zuwa Yammaci (East-West) da ke jihar Ribas.
Sace Matasan NYSC din na zuwa ne kasa da sa’o’i 24 bayan da shugaban karamar hukumar Emohua ta jihar, Dakta Chidi Lloyd, ya ayyana neman wani matashi mai suna Onuigwe Wodi mai shekaru 22 ruwa a jallo har da ladan Naira miliyan 1 kan duk wanda ya bayyana in da yake, bisa samunsa da hannu wajen kashe ‘yansanda, mu’amala da kungiyar asiri, garkuwa da mutane da fashi da makami a hanyar Gabashi zuwa Yammaci da ke jihar.
Lloyd ya kuma sanar da dakatar da biyan albashin jami’an ‘yan banga ta EMOVIS sakamakon gazawar da suka yi wajen dakile karuwar miyagun laifuka a karamar hukumar.
An tare Matasan ne yayin da suke komawa Fatakwal daga sansanin masu yi wa kasa hidima (NYSC) da ke jihar Ondo, yayin da wasu ‘yan bindiga da ake kyautata zaton masu garkuwa da mutane ne suka yi awon gaba da motar bas din su a yankin Emohua dake kan titin Gabashi zuwa Yammaci a daren ranar Talata.
Jami’ar hulda da jama’a ta rundunar ‘yansanda (PPRO) a jihar, Grace Iringe-Koko, ta shaida wa manema labarai a Fatakwal cewa wasu daga cikin ‘yan hidimar kasar sun kubuta daga hannun ‘yan ta’addan.
Iringe-Koko ta bayyana cewa, an tura kwararru zuwa yankin domin tabbatar da ganin an kubutar da ‘yan hidimar kasar da aka sace.
Sai dai ba ta bayyana adadin wadanda suka tsira ba da kuma adadin wadanda aka yi garkuwa da su.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
