Hajjin 2023: NAHCON Ta Ware Wa Maniyyata Kwanaki 5 Don Zama A Madina

Hukumar Jin Dadin Alhazai ta Kasa (NAHCON) ta bullo da wani sabon tsari na masauki a Madina, inda ta umarci maniyyata da su shafe kwanaki biyar kacal a Madina su koma Makka bayan sun ziyarci Masallacin Annabi da sauran wurare masu tsarki a biranen biyu masu tsarki.

Mataimakin daraktan yada labarai da yada labarai na hukumar, Alhaji Mousa Ubandawaki, ne ya bada umarnin a cikin wata sanarwa, inda ya ce manufar ta fara aiki nan take daga ranar 8 ga watan Yunin 2023.

• Gwamnoni Sun Mara Wa Matakin Tinubu Na Cire Tallafin Mai Baya
• Dalilin Da Ya Sa Yankin Latin Amurka Ke Son Fadada Hadin Gwiwa Da Kasar Sin

A cewarsa, an dauki matakin ne don kaucewa cunkoson alhazan Nijeriya a Madina.

“Sabuwar dokar da za ta tilasta wa maniyyatan Madina komawa Makka bayan kwana biyar a birnin mafi tsarki za ta fara aiki daga ranar Alhamis 8 ga watan Yuni 2023.

“Sabuwar manufar ta zama wajibi ne biyo bayan korafin cunkoson alhazan Nijeriya a birnin Madina. Yana da kyau a sani cewa a karon farko cikin dogon lokaci NAHCON ta bai wa alhazan Nijeriya dari bisa dari damar zuwa Madina a matakin farko ko kuma kafin Arfa.

“Duk da haka, don cimma hakan da kuma kaucewa takunkumin da aka kakabawa kasar idan akwai cunkoson maniyyata a Madina, sai da hukumar ta dauki wannan sabuwar manufar, bayan tuntubar juna da kuma shawarwari mai zurfi,” in ji Ubandawaki.

Sanin kowa ne cewa alhazan Nijeriya na zaune ne a unguwar Markaziyya ta musamman a lokacin zamansu a Madina, matakin da ya sha yabawa matuka.

Ubandawaki ya kara da cewa, idan ana son a dore da manufofin, to dole ne a rage adadin kwanakin mahajjata a Madina.