Matar Aure Ta Watsa Wa Budurwar Mijinta Ruwan Zafi A Fuska A Bauchi

Rundunar ‘yansandan Jihar Bauchi ta cafke Fatima Muhammad Sani ‘yar shekara 17 bisa zargin hada baki da ‘yar uwarta mai suna Zulaihat ‘yar shekara 15, inda suka yi wa wata yarinya dukan tsiya.

Matar mai suna Sa’adatu Abdurrahman Liman mai shekaru 19, an ce sun yaudare ta zuwa wani gida da ke unguwar Gida Dubu a karamar hukumar Bauchi, inda suka yi mata dukan tsiya kafin suka zuba mata ruwan zafi a fuska.

• Mutum 100 Sun Rasu A Kifewar Wani Kwale-kwale A Jihar Kwara
• Lawan Ya Zama Shugaban Majalisar Dokokin Borno Karo Na 4 A Jere

Kakakin rundunar ‘yansandan jihar, SP Ahmed Wakil, yayin da yake bayyana lamarin ga manema labarai a ranar Talata, ya ce: “Yarinyar ‘yar shekara 19, Fatima Muhammad Sani da ‘yar uwarta, Zulaihat ne suka shigo da ita wani gida da ke unguwar Gida Dubu. Sun hada baki suka yi wa Sa’adatu duka, sannan suka zuba mata ruwan zafi.

“Wadanda ake zargin sun aikata wannan danyen aikin ne saboda suna zargin yarinyar tana soyayya da mijin Fatimah.”

A cewar Wakil, jami’an ‘yansanda da ke hedikwatar ‘yansanda ta Bauchi, sun yi nasarar kubutar da wadda lamarin ya shafa, inda suka garzaya da ita asibitin kwararru na jihar domin kula da lafiyarta bayan ta samu munanan raunuka a wuyanta da kumatunta.

Ya tabbatar da cewa wadanda ake zargin sun amsa laifinsu a lokacin da ake yi musu tambayoyi.

Kazalika ya ce za a gurfanar da su gaban kotu bayan an kammala bincike.