Tsohon gwamnan Jihar Zamfara, Sanata Ahmad Sani Yarima, ya taya sabon zababben shugaban majalisar dattawa, Sanata Godswill Akpabio da mataimakinsa Sanata Barau Jibrin, murnar zama shugabannin Majalisar dattawa ta 10.
Sanata Yarima, ya kuma taya sabon Kakakin majalisar wakilai, Tajudeen Abbas da mataimakinsa, Hon. Benjamin Kalu, murna kan nasarar da suka samu na zama shugabannin majalisar wakilai ta 10.
- Zaben APC: Yariman Bakura Ya Ce Bai Janye Wa Kowa Takararsa Ba
- 2023: An Bukaci ‘Yan Takara Su Yi Koyi Da Manufofin Yariman Bakura — Onaiyekan
Sakon taya murnar na kunshe ne cikin wata sanarwar da mataimaki na musamman kan harkokin yada labarai na Sanata Ahmad Sani Yariman Bakura, Honorabul Junaidu Attahiru Dosara ya sanyawa hannu.
Sanata Yarima, ya bayyana nasararsu a matsayin wata babbar nasara ga dimokuradiyya da kokarin tabbatar da hadin kan kasa da gudanar da mulki cikin nasara.
Yarima ya bayyana fatansa na samun cikakken hadin kai daga bangaren shugabannin majalisun biyu ta wakilai da dattijai da sauran manyan jami’an majalisar dokoki ta 10, ta hanyar kulla alaka mai karfi ta kud-da-kud tsakanin bangaren zartaswa da na majalisun dokokin ba tare da samun wata matsala ba, don amfanin kasa baki daya.
A karshe Yarima, ya godewa ’yan majalisar dokokin kasar kan goyon bayan da suka bayar wajen zabo sabbin shugabannin majalisar ta 10.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
