Firaministan Kasar Sin Ya Halarci Zaman Mataki Na Farko Na Taron Koli Na 18 Na Shugabannin Kasashen G20

Da safiyar yau Asabar 9 ga watan Satumba, firaministan kasar Sin Li Qiang, ya halarci zama a mataki na farko na taron koli karo na 18, na shugabannin kasashen G20 wanda a yanzu haka yake gudana a birnin New Delhin kasar Indiya, inda ya kuma gabatar da jawabin dake cewa, ya dace kasashe membobin kungiyar G20 su tsaya kan zama tsintsiya madaurinki daya, da daukar nauyin tabbatar da zaman lafiya da samar da ci gaba.

Li ya ce, dan Adam na da makoma ta bai daya, kana, ya kamata kasashen duniya su mutunta juna, da neman kamanceceniya duk da cewa akwai bambancin ra’ayi, da kuma zaman jituwa tare.

• Shugaban Kasar Sin Ya Yi Tattaki Zuwa Wani Karamin Kauyen Da Bala’in Ambaliyar Ruwa Ya Shafa

Firaministan ya kuma jaddada cewa, kasarsa za ta tsaya kan zurfafa yin gyare-gyare a gida, da fadada bude kofa ga kasashen waje, da samar da ci gaba mai inganci, da zamanantar da kasar Sin bisa salonta. Kasar Sin na da makoma mai haske, wadda babu shakka za ta kara sanya kuzari ga farfado da tattalin arzikin duniya da samar da ci gaba mai dorewa.

Kasar Sin za ta hada gwiwa tare da sauran kasashe, domin kara azama da bayar da karin gudummawa ga duk duniya da makomar dan Adam baki daya. (Murtala Zhang)