Rundunar ‘yansandan Jihar Kaduna, ta tabbatar da sace Hakimin Kujama, Mista Steven Ibrahim da ke Karamar Hukumar Chikun a jihar.
A cewar kakakin rundunar ‘yansandan, ASP Munsur Hassan, wanda ya tabbatar da afkuwar lamarin.
- Gobara Ta Yi Ajalin Mutane 3 A Sansanin ‘Yan Gudun Hijira A Borno
- Mun Yarda Mu Hada Kai Da Atiku In Zai Marawa Kwankwaso Baya A 2027 – NNPP
Ya ce an yi garkuwa da Ibrahim ne tare da wasu mutane biyu a lokacin da suke fita daga wani wurin ajiye kaya da ke bayan makarantar Bethel Baptist kusa da babbar hanyar Kaduna zuwa Kujama.
Wani babban jami’in JTF na yankin da ya nemi a sakaya sunansa, ya ce lamarin ya faru ne da yammacin ranar Lahadi da misalin karfe 7 na dare.
A cewarsa, hakimin yankin yana tare da wasu mutane biyu yayin da ‘yan bindigar suka zo a kan babura suka yi awon gaba da su.
“Wurin da lamarin ya faru a bayan makarantar Baptist da misalin karfe 7 na daren ranar Lahadi. Mutanen da ke kusa da al’ummar Anguwar Ayaba sun ce sun ga lokacin da maharan suka tafi da hakimim da wasu mutane biyu,” in ji shi.
Shi ma da yake tabbatar da faruwar lamarin, Ardon Ardodi na Karamar Hukumar Chikun, Ibrahim Saleh, ya bayyana lamarin a matsayin abin takaici.
