Terran Moffi Zai Maye Gurbin Boniface A Tawagar Nijeriya Bayan Ya Samu Rauni

Tawagar Super Eagles ta Nijeriya ta sanar da cewa, Terem Moffi ne zai maye gurbin Victor Boniface da ya ji rauni a cikin tawagar ‘yan wasan da za su wakilci kasar a gasar cin kofin Afrika ta 2024.

Mai magana da yawun Super Eagles, Babafemi Raji, a cikin wata sanarwa da ya fitar cewa, Victor Boniface ya fice daga tawagar kuma Terem Moffi ya maye gurbinsa a cikin tawagar da ke shirin fafatawa a gasar AFCON da za a buga a kasar Cote D’Ivoire.

• Super Eagles Ta Lallasa Kungiyar Al Gharbia Da Ci 12-0 A Wasan Sada Zumunci A Abu Dhabi
• Zamu Dogara Da Osimhen Don Lashe Gasar AFCON – Peseiro

Boniface ya samu rauni ne a lokacin atisaye, hakan yasa ba zai iya ci gaba da kasancewa a tawagar ba.

Ana sa ran dan wasan mai shekaru 23 zai yi jinyar kusan makonni shida.

Yanzu dai hukumar kwallon kafa ta Nijeriya (NFF) za ta jira amincewar hukumar kwallon kafar Afirka CAF akan ta yi wa Moffi rajista a gasar AFCON.