Zaben Fidda Gwani Na PDP: Wike Shi Ne Wanda Ya Yi Nasara —Orji Kalu

Tsohon gwamnan jihar Abia kuma Sanata mai wakiltar Abia ta Arewa, Orji Uzor Kalu, ya yabawa tsohon dan takarar shugaban kasa na jam’iyyar PDP kuma gwamnan jihar Ribas, Nyesom Wike, kan zaben fidda gwani na shugaban kasa na jam’iyyar. Inda ya bayyana shi a matsayin wanda ya yi nasara na hakika.

Kalu, jigo a jam’iyyar (APC), wanda ya bayyana a shafinsa na Facebook a ranar Litinin, ya ce duk da cewa yana da ra’ayin siyasa daban da Wike, amma yana alfahari da gwamnan jihar Ribas.

Ya rubuta cewa: “Duk da cewa ni jigo ne a jam’iyyar (APC), amma dole in ce ina alfahari da yadda Gwamna Nyesom Wike ya nuna jajircewarsa a zaben.

“Eh, ya yi rashin nasara, amma ya yi yaki sosai, ina taya shi murna da kuma yaba wa kokarinsa a zaben fidda gwani na shugaban kasa na jam’iyyar PDP da aka kammala.

“Zan iya cewa Wike shi ne wanda ya lashe wasan saboda dukda haka shi zo na biyu.

“Kayi baka, Nyesom Wike!”