Rundunar ‘yansandan Jihar Kano, sun kama wani kasurgumin dan fashi ake zargi da aikata fashin makami, tare da kwato bindigu biyu kirar AK-47 da alburusai 47.
Kakakin rundunar, Abdullahi Kiyawa, ya ce a ranar Talata aka kama wanda ake zargin, Hassan Iliya, mai shekaru 35, yayin da yake kokarin tserewa a kan babur.
- Gwamnatin Kano Ta Sake Sassauta Dokar Hana Fita
- Zanga-zanga: Tinubu Bai Damu Da Halin Da ‘Yan Nijeriya Ke Ciki Ba – PDP
A ranar 5 ga watan Agusta, 2024, da misalin karfe 2 na dare, wani mazaunin garin Yandadi a karamar hukumar Kunchi a Jihar Kano, ya kai rahoton cewa ‘yan fashi sun kai masa hari a gidansa kuma sun sace masa kudi har Naira miliyan 15.
Duk da zanga-zangar da ake yi, Kwamishinan ‘yansandan jihar, Salman Dogo Garba, ya umarci wata tawaga ta musamman domin kamo ‘yan fashin.
Da misalin karfe 6 na safiyar wannan rane ne, tawagar ta kama Hassan Iliya a garin Alhazawa a Jihar Katsina yayin da yake kokarin tserewa a kan babur.
Sun samu bindigu biyu kirar AK-47, alburusai 47, da kuma Naira miliyan biyar a jakarsa.
Kwamishinan ‘yansandan ya yi kira ga mazauna jihar da su kasance masu sanya ido tare da kai rahoton duk wani abun zargi.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
