Rundunar Ƴansandan Kano Ta Kori Wani Jami’i Saboda Karɓar Na Goro

Rundunar ‘Yansandan Jihar Kano ta kori wani jami’in sa-kai, Ado Abba, bisa zargin gudanar da bincike ba bisa ƙa’ida ba da kuma karɓar kudin haram daga jama’a.

Mai magana da yawun rundunar, SP Abdullahi Haruna Kiyawa, ya bayyana hakan a wani faifan bidiyo da ya wallafa a shafinsa na Facebook, inda ake ganin korarren jami’in tsaye a gefensa domin tabbatar da an san shi. SP Kiyawa ya ce bayan ƙorafin da aka samu, bincike ya tabbatar da laifin jami’in, don haka an kore shi daga aiki kuma ba shi da wata alaka da rundunar.

• Zargin Kwacen Waya: Fusatattun Matasa Sun Bankawa Keken Adaidaita Sahu Wuta A Kano
• Yadda Turmutsutsin Rabon Kayan Abinci Ya Dagula Karsashin Kirsimeti

Ya kara da cewa za a kwace kayayyakin sa-kai daga hannunsa, sannan ya buƙaci jama’a su riƙa kai rahoton duk wani laifi da jami’an ‘yansanda suka aikata. SP Kiyawa ya yaba wa sauran jami’an sa-kai bisa ƙoƙarinsu wajen tabbatar da tsaro a Kano, tare da yin kira da su ci gaba da aiki da gaskiya da ƙwarewa.