Rashford Ya Koma Tawagar Ingila Bayan Shekara Ɗaya

Bayan shekara ɗaya ba tare da kiran tawagar ƙasar Ingila ba, an saka sunan Marcus Rashford, ɗan wasan gaba na Manchester United da ke zaman aro a Aston Villa, a cikin sabuwar tawagar da sabon koci Thomas Tuchel zai jagoranta.

Wasan ƙarshe da Rashford ya buga wa Ingila shi ne sada zumunci da Brazil a watan Maris 2024.

• Birnin Beijing Ya Shirya Yiwa ‘Yan Mata Rigakafin Cutar HPV Kyauta
• Dangote Da NNPCL Sun Koma Teburin Tattaunawa Kan Cinikin Danyen Mai A Kan Naira

Tun bayan komawarsa Villa a matsayin aro daga Manchester United a watan Janairu, ya yi ƙoƙari sosai, duk da cewa bai ci ƙwallo ba, ya taimaka an zura huɗu.

Baya ga Rashford, akwai Dan Burn na Newcastle da Myles Lewis-Skelly na Arsenal, waɗanda suka samu kiran farko zuwa tawagar Ingila.

Ingila za ta fara neman tikitin shiga gasar cin kofin duniya na 2026 da wasanni a Wembley da Albania da Latvia a ranar Juma’a 21 da Litinin 24 ga Maris.

Rashford, mai shekaru 27, ya buga wa Ingila wasanni 60 tare da cin ƙwallaye takwas.

Amma bai samu dama a hannun tsohon koci Gareth Southgate ba, inda aka cire shi daga gasar Euro 2024 da kuma Nations League ta 2024-25.