Sin: Batun Taiwan Sha’ani Ne Na Cikin Gidan Kasar Sin Kuma Bai Yi Kama Da Rikicin Ukraine Ba

Mai magana da yawun ma’aikatar harkokin wajen kasar Sin Lin Jian ya bayyana a wani taron manema labarai da aka saba yi a-kai-a-kai da ya gudana yau Laraba, 4 ga watan Yuni cewa, Taiwan wani yanki ne da ba za a iya raba shi da kasar Sin ba, kuma batun yankin Taiwan sha’ani ne na harkokin cikin gidan kasar Sin, kana ba ya kama da rikicin kasar Ukraine.

Don haka, kasar Sin tana adawa da duk wata magana ko wani take-take da ke kokarin kawo rudani ko yi wa batun Taiwan ungulu da kan zabo, kuma ta bukaci bangarorin da abin ya shafa da su mutunta manufar kasancewar Sin daya tilo a duniya ta hanyar bin ka’ idar a aikace da kuma mutunta ikon mulkin kai da cikakkun yankunan kasar.

• Babban Sauyi Da Ba a Taba Ganin Irinsa Ba a Karni Guda: Alkiblar Da Sin Take Bi Wajen Samun Bunkasuwa 
• An Samu Karuwar Kaso 2.7 Na Yawan Tafiye-Tafiye Zuwa Ketare Yayin Hutun Bikin Dragon Boat Na Kasar Sin

Kwanan baya, wasu shugabannin kasashen Turai sun kwatanta sha’anin Taiwan da batun Ukraine a yayin da suke halartar taron tattaunawa na Shangri-La, inda suka yi rika yin yamadidi da abin da suka kira da wai “barazanar kasar Sin” kan batun tekun kudancin kasar Sin, kuma suka yi nuni da cewa, kungiyar NATO tana da hujjar tsoma baki a yankin Asiya da tekun Fasifik.

Lin Jian ya yi wannan bayanin ne a cikin amsar da ya bayar kan tambayoyin da suka jibanci haka.

Har ila yau, ya bayyana cewa, bangaren tekun kudancin kasar Sin gaba daya yana cikin kwanciyar hankali kuma babu wata matsala game da ‘yancin zirga-zirgar jiragen ruwa da na sama da dukkan kasashe ke morewa bisa doka.

Ya ce, a ko da yaushe, kasar Sin na dagewa kan amfani da tattaunawa da tuntubar juna wajen warware sabani da magance abubuwan da aka sha bamban a kai game da teku yadda ya kamata a tsakanin kasashen da abin ya shafa kai-tsaye, bisa mutunta hakikanin tarihi na gaskiya.

Haka nan, ya kamata kasashen da ba na yankin ba su mutunta kokarin da kasashen yankin suke yi na tabbatar da zaman lafiya da kwanciyar hankali a tekun kudancin kasar Sin, maimakon haddasa fitina da haifar da zaman doya da manja. (Abdulrazaq Yahuza Jere)